Qué é USN

Antecedentes e descrición xeral

Durante os últimos meses do ano 2007, o Concello de Santiago estivo a traballar na preparación dun proxecto de rexeneración da zona norte de Santiago co obxectivo de concorrer á convocatoria que se abriría no ano 2008 da Iniciativa Urbana cofinanciada polo Fondo Europeo de Desenvolvemento Rexional (FEDER).

Ese proxecto, que foi presentado aos interlocutores sociais, recolle un conxunto de actuacións de carácter integral nos barrios de Vista Alegre, Romaño, Vite, Guadalupe, Salgueiriños, San Caetano, Basquiños, Ultreia, Espírito Santo, A Estila, A Almáciga, San Pedro, Concheiros, Belvís e Quiroga Palacios.

Tras a presentación da candidatura en xaneiro de 2008 o proxecto foi aprobado definitivamente polo Ministerio de Economía no mes de xullo cun orzamento global que ascende a 11.433.590 € dos cales o Fondo Europeo de Desenvolvemento Rexional aporta 8.003.513 € (70%) e o Concelo contribúe con 3.430.077 € (30%).

O Proxecto Urbana Santiago Norte, ten como obxectivo a posta en marcha dunha estratexia integral de rexeneración urbana nos barrios da zona norte para equilibralos co resto da cidade.

Trátase dun proxecto que ten un marcado carácter innovador: tanto polo enfoque integrado que nel se plantexa para abordar os diferentes problemas da zona norte, como polo emprego de novas formas de intervención, especialmente naquelas accións que promoven a integración social e a dinamización económica da zona.

Contémplanse dentro do Urbana un conxunto de medidas e actuacións que se agrupan en nove áreas temáticas:

1. Sociedade da información
2. Fomento da integración social e da igualdade de oportunidades
3. Medio ambiente urbano e fomento do tratramento de residuos
4. Desenvolvemento do tecido ecnonómico: accións a favor do emprego, e da actividade empresarial
5. Accesibilidade e mobilidade
6. Fomento do uso máis eficaz da enerxía
7. Cultura e patrimonio
8. Infraestruturas de servizos
9. Formación profesional

O conxunto de accións concretas do proxecto complétase con outras de carácter transversal como son:

• O proceso de participación cidadá: O proxecto dotase dos instrumentos e canais necesarios para que a cidadanía residente na zona de actuación e máis a do resto da cidade, poida participar activamente no proceso de execución. Para iso, entre outras medidas púxose en marcha o Órgano de Participación Cidadá, no que están representados os veciños da zona e mais os principais axentes económicos e sociais que actúan nela.

• A participación en redes de intercambio de experiencias: onde se porán en común con outras cidades que desenvolven proxectos da Iniciativa URBANA estratexias para dar solucións aos problemas dos barrios co obxectivo de atopar as mellores prácticas.

• A posta en marcha dun conxunto de medidas de información e publicidade: destinadas a facilitar á cidadanía da zona norte e do conxunto da cidade información puntual sobre como a situación e evolución na execución do proxecto.

Zona de Actuación

A zona de actuación estará constituida polos barrios do norte de Santiago: Vista Alegre, Romaño, Vite, Guadalupe, Salgueiriños, San Caetano, Basquiños, Ultreia, Espírito Santo, A Estila, A Almáciga, San Pedro, Concheiros, Belvís e Quiroga Palacios.

Trátase dunha área que presenta un volume demográfico superior aos 18.000 habitantes e unhas características socioeconómicas moi similares, con moitas construcións antigas e/ou necesitadas de reformas, cun deseño de rúas inacabado ou non acaído ás necesidades actuais, e cunhas necesidades comúns en materia de infraestructuras e de activación de dinámicas económicas e sociais.

Co desenvolvemento do Proxecto URBANA preténdese acadar unha rexeneración económica e social dos barrios propostos, tentando equilibrar ou equiparar a súa situación coa do resto da cidade.

Estratexia e obxectivos

A partir do diagnóstico que presenta a zona de actuación cunha situación de desavantaxe socioeconómica en comparación co resto da cidade, a formulación de obxectivos e liñas estratéxicas do proxecto baséase fundamentalmente en:

1. Abordar os aspectos claves para a recuperación ambiental e urbana da zona de actuación, como base para a súa dinamización económica e a súa plena inserción nas dinámicas da cidade en estreita cooperación cos axentes económicos e sociais.
2. Asegurar a complementariedade e coherencia con:

• Obxectivos e prioridades comunitarios establecidos en materia de desenvolvemento sostible
• Outras políticas comunitarias, en especial, coas relativas ao emprego, ao medio ambiente, á igualdade de oportunidades, e ao desenvolvemento da sociedade da información
• A estratexia de desenvolvemento rexional e da cidade, e en especial coas actuacións previstas na zona de Santiago norte

Deste xeito o obxectivo central do proxecto Urbana Santiago Norte é converter esta zona de Santiago nunha zona residencialmente atractiva e plenamente incorporada ás dinamicas socioeconómicas da cidade

A partir deste obxectivo central podemos definir os seguintes obxectivos específicos:

• Mellorar a calidade de vida na zona de intervención
• Incrementar as posibilidades de emprego dos residentes
• Aumentar as dotacións de servizos públicos, especialmente dos equipamentos que facilitan a socialización
• Facilitar a integración de colectivos en risco de exclusión